苦工日子

每天乘火車上班，在等待火車的時候竟然畀我遇到亞龍心目中的女神……小芬女，每天和她一同乘車上班，漸漸亦熟絡，有時都會相約一同看戲，好似亂世佳人，衝上雲霄等，在那個時候小芬女同是在尖沙咀上班，時間許可，我們都會相約一同吃飯，當時是仍有人包伙食的，只要我們的人數湊夠一圍，便可到包伙食地方吃飯，在廣東道兩旁的二樓，記得小芬女是很喜歡吃魚的，包伙食是飯任食湯任飲，有魚，有肉，有菜有湯，每人要湊多少錢，我現在己忘了是要多少，可惜和小芬女子不是很長，她的公司便遷到中環，我們的友誼亦因而告一段落，現在也很懷念她的笑容，十足布拉格之戀的全度賢一樣，笑起上來鼻樑和兩旁都起晒皺紋。
和其他同事除了賭馬仔還有多節目，玩斜釘，打天狗，打麻雀等，當然是放工後才會做。
有一次，在九龍公園當值的看更沒有騁請到人，於是要我們一眾輪流當值，當值的時候，由下午才開工，收工便到九龍公園做看更，看更的時候到12時便要出外打更鐘，當時公園四周險暗，只得自己一個，都會有點兒驚恐，不過，打完更鐘，便瞓覺，第二日有人上班便收工，多出的時間又有加班費，收入都好可觀。不過只是維持了個半月，後來負責人覺得貴重嘅東西都放入有鎖的防盜門之內，便不再需要我們替看更位置。

苦工同事

在星光行上班，有三位直接管轄我們的同事，除了之前提及過的盧先生，還有一位周小姐及一位談小姐，佢地主要分配工作，而盧先生主要就每天分派我們站立的崗位及輪流替吃飯時間，除了我，還有亞文，亞黃，亞李，亞楊及亞成等等，而我哋做的工作負責看守展品，維持展覽廳的秩序，各自負責區域行行坐坐，通常都在自己和外一區界線中間談話。除了我們之外還有兩個木匠亞華和何仔，2個勞工，林仔雄仔。除咗在這展覽廳外，每3個月左右，便輪流到李鄭屋邨駐守，但李鄭屋邨並不是像這裏有一個大展館，看守的是一個古墓，而且要給入場費一角。古墓名符其名真係一個古墓，並不是像神鵰俠侶一樣，可住人和秘密練工的地方。
我哋巡館的管理人，而兩名木匠是為展覽前期及後期的工作人員，專為裝飾、佈置，油漆，展覽完畢，拆卸，裝箱。而勞工當然是負責搬搬抬抬的雜務。展覽廳是分兩部分，頭一部份是永久擺放……是關於香港的歷史放了相片、漁船模型、和一些石刻，展示了香港當時有的漁類品種。而另一部分是時常更換專題展覽：澳洲土著文化，香港錢幣，香港古蹟。
在我們當中工作最有經驗的是亞成，每逢有學校團體到訪，必定由他領軍講解，由香港為何叫做香港，香港嘅一些名稱由來等等。但若多過兩團，便由談小姐或周小姐帶着講解另外一團。不過通常有些是老師帶着，由老師自己會親自講解。
每日我可以有兩種方法上班，一是乘火車到紅磡，沿梳利是巴里道，由海邊行到碼頭，另一是乘巴士到佐敦道碼頭，然後沿廣東道直行到星光行，但由放搭火車好過搭當時的熱狗，所以通常都是從火車的路線出發。加上當時海邊的道路空氣，比起廣東道的空氣是更加清新。老實講，現時的永安廣場尖沙咀中心，帝國中心，我一路睇住佢哋建成。穿過咗之後便看到新世界中心，當時有間東急百貨是很出名，有一張十層樓高的大海佈，太空館等都是同期建成。每天到達星光行，是先到地庫下面嘅美心吃早餐，當時上班時間是9:45，下班時間是6:15。亞文，盧先生和我都是愛賭馬之人，每逢賽馬日，閒來便會聚在一起硏究馬仔，有時還會和盧先生一起入馬場碰碰運氣。

第一份苦工(二)

報到咗之後，有老細請飲茶，還有人請食西餅，飲完茶食完餅，有個管我哋嘅senior，叫做盧先生，對我說「買嘅餅食唔晒，剩番嗰啲唔好嘥，拎番屋企食埋佢」，用個盒包度靚一靚，還縛好晒添！到咗將近收工嘅時候，會有個高級人員係房度standby，佢哋話佢係KEYHOLDER，我心諗，街邊的鎖匙佬，究係 KEYHOLDER ，有乜咁巴閉要等我哋呢班職員仔收工呢！原來當我哋關好晒門走到門口， KEYHOLDER就會用鎖匙開咗個盒仔，禁制，落閘，然後開制，着咗紅燈，咁樣就會開咗防盜系統。我真係鄉下仔，第一次見啲咁嘅嘢咋。收工便攞埋盒餅走，誰不知去到左敦道碼頭的排隊時候，盒餅打側咗，我以謂花餅瞓低咗，咪打開佢囉！點知成盒都係垃圾，我心諗盧先生咁樣都弄錯，真係烏龍！但成條龍的人就好奇怪咁，為何無端端成盒餅放入垃圾筒內。
到咗另一天收工，今次嚟嘅KEYHOLDER係一個洋人，原來就係最高級嘅館長，叫做MR PEACOCK，盧先生話個館長好鍾意了解啲職員對展覽啲節目到底清唔清，會問我哋問題，畀咗一本小笧子我哋叫我哋番去諗熟佢。後來我先知佢哋好鍾意玩啲新人，有個嚟早過我一兩個月嘅新人，本來每職員都有製服，但就對佢講，館長好鍾意人上身穿制服，下身穿牛仔褲，結果嗰個同事穿咗一個星期咁嘅服飾，發覺唔對路，之後先再冇咁着。
在尖沙咀上班嘅時候，我通常都係搭火車，去到紅磡總站，好多時都會穿過地下，由隔離嘅中央郵政總局穿過去，個陣時火車仲未係電氣化時代，而且部份鉄路仲係單軌雙程行車，大埔至大學站，個陣時中間仲有大埔滘站，沙田同旺角站，都仲係單軌雙線行車，若一小時才有一班車到紅磡，錯過咗就要等到發呆，才有下一班車，當時因為要收票，好多人都唔會買票，經隔離郵局便可以慳得就慳。

換碼

今日股市向上，有人沒有資金，但要換碼，早兩年買下656，苦守2、3年，仍未到家鄉，問我走咗去，還是繼續守，我唔想揹鍋，惟有勸其打電話問節目主持，咁啱俾佢打通咗，主持話該股漸漸轉弱，衝唔過$9.50就要走咗先，假如跌破$8.80都係要走，今日麻麻煩煩講埋啲掛高2格，又唔係多，走咗佢咪算囉，又係度問長問短，到係時候叫佢溝貨時候，話咗唔排，費事又要追貨追到氣咳，點知該名人士，又話要排低5格，真係俾佢吹到啤啤脹。因為搞佢嘅嘢，搞到自己買貴咗成千蚊。本來沒錢買貨，惟有賣咗隻61頂住檔先，入番一手6863@$2.33。
6863是某某人在高位買咗，成日問我幾時溝貨，我話你溝貨唔知溝到幾時先升，所以在跌到定嘅時候，突然彈番上嚟，便要不論價錢即刻追貨。自從用咗這一個方法，一直都覺得好有效。

錯失良機

星期三，投注賽馬，一方面要替朗朗拉票，一方面要抽時間陪伴小叻，搞到分身乏術，自己投注賽馬，唯有提早落注，自己一向買開的勁勇威龍，之前亦落咗唔少錢落去，吃完飯，到達投注站，發覺中咗一場，跑到第6場終於起孖，計落都可以保本，不過仲有糊叫，是第七場一拖6, 9 ，但原來自己一向買開的6號竟然沒有用嚟做胆，當時沒有發覺。臨場還叫馬友買四條勁，即3、6、8、10，但自己臨場就沒有再買，結果跑出咗3、6、9 ，連贏跑咗3-6四千多完，位置Q一條千幾，一條二千幾，但自已過關就輸咗，睇番轉頭，一向買開的竟然遺忘了，又錯失咗收2萬多元的機會，真是神推鬼拉，我係咪好豬仔呢！

揀股投資

上一次在事與願違內，講述投資股票，講咗94，和61兩隻股票，94號好好彩，不足兩星期，已經升到10%，即使是61號都好好彩，有些少微利，試過上次的經驗，94試一下去唔去到$0.70先至考慮沽出，現時有兩隻吼緊中的股票，是366和355，兩隻都是賺錢公司的股票，吼嘅原因是355嘅PE極低，買入是等候有人來炒，即使冇人炒，收息亦有不俗的回報，若買入咗，給3個月時間，睇佢升唔升到$0.80至$1.00，這隻股票，幾年內未炒過，升起上嚟都唔講得笑。366則股價跌得過殘，爆升起上嚟，應有不俗的回報。

第一份苦工

在工廠工作，一直生活都不錯，有時要開OT加班，加班嘅時候，大部份都不用工作，主要是等貨物送到收貨，而且包埋飯盒，大伙兒一邊工作，一面有講有笑，而且高層有人喜歡打籃球，下班後，通常在星期六長週，或短週星期五，會用廠車接到粉嶺運動場打籃球，係咪好健康呢！在貨倉內，最高領導人是STOREKEEPER，另外有個皇馬掛，閒閒企企，唔駛點做，乾支人工，STOREKEEPER 叫做TONY，閒來便對着我們講一下佢風花雪月嘅事蹟，不知道是因為他講得繪形繪聲，還是因為我哋成班都是青年人，對於新奇嘅事物特別有興趣聽。這樣的日子過了一年，Tony 見我認真工作，又有責任感，欲想晉升我為leader，但剛剛收到另外一份工的電話通知，要我明天上班，但我要給工廠7天通知，要遲一星期才可上班。
一星期後，我便到大會堂報到，對於我這一個初出茅廬的小子，即使要到大會堂，都要睇熟地圖先識去，(剩係記得响升中嘅時候有人帶住到麗澤中學考過一次試，)在當時是要搭巴士到碼頭，再轉渡海小輪，然後到達大會堂，當時請我嘅部門叫做文化事務署，嗰陣時個署長叫做陳達文，報到咗之後，又畀封信我到九龍公園到所屬部門報到，佢問我識唔識去九龍公園，我話唔識，佢仲畫埋張地圖畀我，教我搭咗船之後沿着廣東道一直走，然後在海防道再上左邊第一間屋，我跟住佢畫走，果然走到目的地是外貌都幾舊下的一間屋，花園裏放滿咗各樣古舊物品，石刻或者是石碑之類。入咗去見到個負責人應該是一位行政主任，負責睇完失封信後，又帶我走番廣東道，番到碼頭附近嘅星光行，乘自動電梯，上到四樓，是一間很大的展覽廳，擺放着很多漁船模型，但每隻卻做得很精緻，船上的設備都做很細微，牆上掛着很多古舊的圖片。負責人將我介紹給所有人，這便是我工作的地方。

正義之師

星期五下班後，乘火車回家由於人多，我沒有坐位，同樣有一個女子也因而站着，在我們站着位置的地方，坐着三個互相認識的乘客，在自己的物品中取出一些硬殼果之類的物件，突然間，我身旁的女子勸告，「火車是不可以進食的。」其中一個便說，若果我有食，我食你先話我，另外一個則說，你可以剝咗唔食，拿一個袋裝起它，餘下一個一句說話都冇講，但他卻硬要嘗試打開硬殼果，目的是要看該名女子有何話講，然而他卻一直未能成功，未幾另外一個隨即話，這一些事不是救人，是沒有獎金的。我若是這個女子，做埋這些事……吃力不討好，還要聽到這一群人單打嘅說話，心內一定很不好受。
若果你是該名女子，你們會像她做同類的事嗎！

運氣驅動

上星期買賣股票，賺少咗2萬元，心想運氣不佳，星期日跑馬，一心想着要戒賭，早上報紙也沒有買，到了下午，天氣很差，平時要看的節目，竟然無故取消，無所事事，實在悶到發呆，終於轉到賽馬台看看跑馬，誰不知不看就由是可，一看又按奈不住，心想買一百元胆一拖五，連贏和位置Q，中就中，唔中便算，結果胆陽光王子跑第4，輸咗，弊在有隻腳退出，有20元收番，迫住又要走去投注站收錢，入了投注站，忍不住又買了1號振興中華，心想反正2萬元都冇咗，當輸多2百算數，100元獨贏，100元位置，點知今次竟然好好彩贏咗個鼻，影相影贏咗，張飛派彩有$2000，心想唔通好似六合彩廣告話齋，運氣嘅野話嚟就嚟，於是把心一橫，要將贏咗嘅錢押埋落去，繼續同佢搏過，於是速速去買份報紙，如是者由第五至第七場，每場都買2百元左近，但都泡湯，到咗第八場以乎要跑熱門馬，只注了一百元，便呆在家中專注第九場，因為跑一千，顧專揀外檔馬，結果三大熱門都是外檔馬，另外一隻是杜利來騎嘅駿馬得利，報紙評語係上一次柏寶騎，最後三百米，沒有騎過，只輸三個半馬位，於是跑完第八場，當然又泡湯，速速走去没注站，但沒有現金劵，人又多惟有排大額2百元一票，結果買一拖三，駿馬得利拖三大熱門，連贏及位置Q，(當時只看報紙賠率為56倍)，為了湊夠200元，惟有買40元一注，結果跑咗出嚟，連贏位置Q全部收到盡，連贏收$1664.50，位置Q一條$476，一條$858.5，一鋪搞掂，乜仇都報晒！收番12000大元。(跑完先知，隻馬後來跌到99賠咁冷。)
諗心一層，唔怪得之啲賭仔成日都話有賭未為輸，未到最後都唔知鹿死誰手！

笑話

今天工作很忙，一路要專心工作，突然聽到「逢逢逢」，於是有人大聲話有人發脾氣，隨即聽到有人反駁，「不是發脾氣，是我個水壺眼瞓，結果佢就瞓低咗。」

兒時生活記趣

從小在大埔長大、生活，對於在海邊生活，摸蚧，捉蝦、捉蟹，自然少不了，記得有一次在潮退時到海中摸蚧捉蝦，一時忘形，潮漲時犯險過河，幾乎沒頂，心想好險﹗

捉蝦仔原來很好玩，記得在水退的河中，從淺水中把沙推到岸上，若有蝦的話便會跳來跳去，便很容易把牠們捉着，但在水中游着的蝦卻很難空手捉到的。

小時候有時會幫補家計，會幫媽媽穿塑膠花，亦曾穿過一D黃色 玻璃珠，而姐姐則比較能幹，會幫媽媽綉花，不過綉的通常是填底，即是主要的花紋已經綉一個類似燒烤的網(當然的格仔比例細小十分之一左右)，我們把餘下未綉的部分填上而已。有時，從手套廠拿手襪回家，剪線頭，反手襪等的家庭式工作都做過。
長大一點（六年級左右），已可替人起蟹肉，是把已蒸好的蟹，把蟹殼拆除，不過有時趁老闆不察覺，自己都會偷一兩口吃，當然自己平時很少机會可以吃到，現在想起仍然回味無窮呢﹗（人工好像是個半拆一斤蟹肉）

畢業後的工作

中學剛畢業時，成績普通，報讀中六，又不是很突出的成績，很多學校都拒絶收我，所謂讀書不成三大害，最終出來社會做事，初時感覺很迷茫、很困惑，不知方向，加上遇到油價飛升，利率趨升，當時很多工廠都無法支撐而結業，市況經濟消條，我和一般人一樣都很難找到工作，和一般市民都是到勞工處登記找工作，無論甚麼工作都不拘，即使是老人家做的工作看更，也亂石投林，儘管一試，起初是都一家手袋廠當雜役，剪下線頭，搬搬抬抬，做了不足三個月，收到勞工處通知，可到附近的一家影印機廠當倉務，每月薪金約600元，每月出糧兩次，當時的同事和我一樣都是一班年青人，主要是在貨倉收發零件，有貨物運到，便要開箱，然很點算一下貨物數量，紀錄存倉，但即使是新收到的零件，新收的零件會有品質檢查部負責，有些還需要加工，例如尺碼有差異，要再交到外面給其他公司加工，打磨，電鍍，加工完，又回交回到倉，所有零件要品質檢查合格，才可發放到工場做裝機，每月生產部欠缺甚麼零件，組長便會向貨倉要求發放，而組長亦會點收，貨倉內全部清一色是男生，和生產部不同大部份是女工，大伙兒一邊工作，一邊講笑，有時講生產部邊個女仔靚，有時會講邊個身材好，記得有個同事好似叫「亞龍」，佢就好迷生產線中的女仔，個女仔個名有個芬字，佢就好似我哋細個睇小露寶咁，叫咗嗰女仔做小露寶好鐘意嘅「小芬女」勒，大家一同玩在一起，打麻雀，打卓球，一同到酒吧飲啤酒，或者到酒廊聽歌，當時的生活無憂無慮，亦很自在。

事與願違

今個星期初，投資了一隻股票1399，到了星期四，已經有百分之十的升幅，心想放一天假到時睇準一點，放個好一點的價錢，本來定下目標價位是$0.70，結果到了股票行，卻因為慌慌張，未到目標價已放了出去($0.64)，可以話是原來賺的一半，但到了收市，回頭一看，可以賺的是應賺的五份之一，今次變成損兵折將，不過算數了，始終自己是有一份正當職業，總不能要心掛掛，況且這一些都是運氣使然。能夠找到一隻賺20%(若根目標價放出)的已經好好彩，事後才知到原來可以賺60%，水瓜打狗，唔見咗一大節，欲哭無淚。
現在不是懷緬過去的時候，要繼續向前看，避免影响日後決定。下星期要開始吼實94，61號這兩隻股票(今天買的)，期望這兩隻都有類似的升幅(10%)。